മലയാളിക്കൂട്ടം

ഓണക്കാഴ്ച ടി.വി.ചാനലുകളില്‍.

2009-08-21T22:57:00.001+05:30

ഓണക്കാഴ്ച ടി.വി.ചാനലുകളില്‍.

ഫോട്ടോഗ്രാഫര്‍മാരുടെ ഓണ്‍‌ലൈന്‍ കൂട്ടായ്മയായ ‘മലയാളിക്കൂട്ടം‘ കൊച്ചിയിലെ ദര്‍ബാര്‍ ഹാള്‍ ആര്‍ട്ട് ഗാലറിയില്‍ അണിയിച്ചൊരുക്കിയ ‘ഓണക്കാഴ്ച’ ഫോട്ടോ പ്രദര്‍ശനത്തെക്കുറിച്ച് പ്രമുഖ ടി.വി.ചാനലുകളില്‍ വന്ന വാര്‍ത്ത.(വീഡിയോ)

ഇന്ത്യാവിഷന്‍ ചാനലില്‍ പ്രക്ഷേപണം ചെയ്തത്.

ഏഷ്യാനെറ്റ് ന്യൂസ് ചാനലില്‍ ഇന്ന് വിവിധ സമയങ്ങളില്‍ പ്രക്ഷേപണം ചെയ്തത്.

(കൈരളി ചാനലുകാര്‍ ഷൂട്ട് ചെയ്തത് ഇനി എന്നാണാവോ പ്രക്ഷേപണം ചെയ്യുന്നത്? :) )

***

ഈ പ്രദര്‍ശനം ആഗസ്റ്റ് 23 വരെ തുടരും. ഇതില്‍ നിന്നും ലഭിക്കുന്ന തുക അനാഥാലയത്തിലെ കുട്ടികള്‍ക്ക് ഓണസമ്മാനം നല്‍കുന്നതിനായി വിനിയോഗിക്കുന്നതാ‍ണ്.

മാധ്യമങ്ങളില്‍ ഓണക്കാഴ്ചയെക്കുറിച്ച്.

2009-08-19T23:25:00.006+05:30

മാധ്യമങ്ങളില്‍ ഓണക്കാഴ്ചയെക്കുറിച്ച്.

ഇപ്പോള്‍ കൊച്ചിയിലെ ദര്‍ബാര്‍ ഹാള്‍ ആര്‍ട്ട് ഗാലറിയില്‍ നടന്നുവരുന്ന ‘ഓണക്കാഴ്ച’ ഫോട്ടോ പ്രദര്‍ശനത്തെക്കുറിച്ച് ഇന്നത്തെ പത്രമാധ്യമങ്ങളില്‍ വന്ന റിപ്പോര്‍ട്ട്:

ഓണക്കാഴ്ച പ്രദര്‍ശനത്തെക്കുറിച്ച് ഇന്ത്യന്‍ എക്സ്പ്രസ്സില്‍.

ഇന്ത്യന്‍ എക്സ്പ്രസ്സിലെ കവറേജ്.

ഇന്ത്യന്‍ എക്സ്പ്രസ്സ് ഓണ്‍‌ലൈന്‍ എഡീഷനില്‍.
--

ഇലക്ട്രോണിക്ക് മാധ്യമങ്ങള്‍ റിപ്പോര്‍ട്ട് ചെയ്യുന്നു.

കൈരളി ചാനലിനുവേണ്ടി.

FM റേഡിയോ റിപ്പോര്‍ട്ടിംഗ്.

ഓണക്കാഴ്ച്ചയെക്കുറിച്ച് മനോരമയില്‍.

2009-08-18T22:22:00.000+05:30

ഓണക്കാഴ്ച്ചയെക്കുറിച്ച് മനോരമയില്‍.

മലയാളിക്കൂട്ടം കൊച്ചിയിലെ ദര്‍ബാര്‍ ഹാള്‍ ആര്‍ട്ട് ഹാളില്‍ അണിയിച്ചൊരുക്കുന്ന ഓണക്കാഴ്ച്ച ഫോട്ടോ എക്സിബിഷന്‍ ചിങ്ങം ഒന്നിനു (ആഗസ്റ്റ് 17-ന്) റിട്ട: ജസ്റ്റീസ് വി.ആര്‍.കൃഷ്ണയ്യര്‍ ദീപം കൊളുത്തി ഉദ്ഘാടനം ചെയ്തു. ഓണക്കാഴ്ച ചിത്രപ്രദര്‍ശനത്തെക്കുറിച്ച് ഇന്നത്തെ മലയാള മനോരമ പത്രത്തിലെ സചിത്രവാര്‍ത്ത ചുവടെ:

(വലുതായി കാണാന്‍ ചിത്രത്തില്‍ ക്ലിക്കുക)

ഈ പ്രദര്‍ശനത്തിന് വളരെ നല്ല പ്രതികരണമാണ് സന്ദര്‍ശകരില്‍ നിന്നും ലഭിക്കുന്നതെന്ന് സംഘാടകര്‍ അറിയിച്ചു.

ഈ പ്രദര്‍ശനം ആഗസ്റ്റ് 23(അത്തം) വരെ തുടരുന്നതാണ്.

പൊന്നിന്‍ ചിങ്ങനാളില്‍ 'ഓണക്കാഴ്ച'ക്ക്‌ തുടക്കമായി.

2009-08-17T22:15:00.002+05:30

പൊന്നിന്‍ ചിങ്ങനാളില്‍ 'ഓണക്കാഴ്ച'ക്ക്‌ തുടക്കമായി.

മലയാളിക്കൂട്ടത്തിലെ ഏവരും കാത്തിരുന്ന ഓണക്കാഴ്ച ഫോട്ടോ പ്രദര്‍ശനം പൊന്നിന്‍ ചിങ്ങനാളില്‍ കൊച്ചി ദര്‍ബാര്‍ ഹാള്‍ ആര്‍ട്ട്‌ ഗാലറിയില്‍ വെച്ച്‌ റിട്ട:ജസ്റ്റീസ്‌ വി.ആര്‍.കൃഷ്ണയ്യര്‍ ദീപം തെളിയിച്ചുകൊണ്ട്‌ ഉദ്ഘാടനം ചെയ്തു. മലയാളിക്കൂട്ടം ചെയ്തുവരുന്ന കാരുണ്യപ്രവര്‍ത്തനങ്ങളുടെ ഭാഗമായി, ഉദ്ഘാടനവേളയില്‍ മുഖ്യാതിഥി സാന്ത്വനം ചാരിറ്റബിള്‍ ട്രസ്റ്റിലെ പ്രതിനിധീകരിച്ച്‌ എത്തിയ കുട്ടിക്ക്‌ ഓണപ്പുടവ സമ്മാനിച്ചു. സാന്ത്വനം അനാഥാലയത്തിലെ എല്ലാ കുട്ടികള്‍ക്കും മലയാളിക്കൂട്ടം ഓണപ്പുടവ സമ്മാനിക്കുന്നുണ്ട്‌. ലോകത്തിന്റെ നാനാഭാഗത്തുള്ള അമേച്ചര്‍/പ്രൊഫഷണല്‍ ഫോട്ടോഗ്രാഫര്‍മാര്‍ മലയാളിക്കൂട്ടം എന്ന ഒരു കുടക്കീഴില്‍ ഒത്തുചേര്‍ന്ന് സംഘടിപ്പിച്ച ഫോട്ടോ പ്രദര്‍ശനത്തേയും, കൂട്ടായ്മയുടെ കാരുണ്യപ്രവര്‍ത്തനത്തേയും മുഖ്യാതിഥി റിട്ട:ജസ്റ്റീസ്‌ കൃഷ്ണയ്യര്‍ പ്രകീര്‍ത്തിച്ചു. ലോകത്തിന്റെ പലഭാഗങ്ങളിലായി ചിതറികിടക്കുന്ന അംഗങ്ങളുടെ ഈ കൂട്ടായ്മക്ക് ‘മലയാളിക്കൂട്ടം’ എന്ന പേര്‍ നല്‍കിയതിനെക്കുറിച്ചും, ഈ പ്രദര്‍ശനം ചിങ്ങം ഒന്നുമുതല്‍ അത്തം വരെ നടത്താന്‍ തീരുമാനിച്ചതിനെക്കുറിച്ചും മുഖ്യാതിഥി എടുത്തുപറഞ്ഞു. മാതൃഭാഷയായ മലയാളത്തോടും സമൂഹത്തിലെ നമ്മള്‍ കൂടുതല്‍ ശ്രദ്ധിക്കാതെ പോകുന്ന നിസ്സഹായരെയും അനാഥരെക്കുറിച്ചും ഓര്‍ത്ത് തങ്ങളെകൊണ്ടാവുന്നത്, അത് വളരെ ചെറിയ സഹായമാണെങ്കില്‍ കൂടിയും, ചെയ്യാന്‍ താല്‍പ്പര്യം കാണിച്ച ഈ കൂട്ടായ്മയെ, പ്രത്യേകിച്ചും ചെറുപ്പക്കാരെ, റി.ജ:കൃഷ്ണയ്യര്‍ പ്രകീര്‍ത്തിച്ചു. മലയാളിക്കൂട്ടത്തിന്റെ പ്രവര്‍ത്തനങ്ങളെക്കുറിച്ചും മറ്റും സംഘാടക പ്രതിനിധി ശ്രീ ബോബിന്‍സണ്‍ സംസാരിച്ചു. ഓണക്കാഴ്ചയില്‍ പ്രദര്‍ശിപ്പിച്ചിരിക്കുന്ന മലയാളിക്കൂട്ടം അംഗങ്ങളുടെ ഇരുന്നൂറോളം ചിത്രങ്ങള്‍ മുഖ്യാതിഥിയും മറ്റും ചുറ്റിനടന്ന് കണ്ടു. ഓണക്കാഴ്ച ചിത്രപ്രദര്‍ശനം ഉദ്ഘാടനം റിപ്പോര്‍ട്ട്‌ ചെയ്യാനായി പ്രിന്റ്‌/ഇലക്ട്രോണിക്ക്‌ മീഡിയ പ്രതിനിധികളും എത്തിയിരുന്നു.

ഇനി അത്തം വരെയുള്ള ഏഴ്‌ ദിവസങ്ങളിലും ഓണക്കാഴ്ച പ്രദര്‍ശനം കാണാന്‍ കൂടുതല്‍ സന്ദര്‍ശകര്‍ എത്തുമെന്ന് സംഘാടകര്‍ പ്രതീക്ഷിക്കുന്നു. പ്രദര്‍ശിപ്പിച്ചിരിക്കുന്ന ചിത്രങ്ങളില്‍ ഇഷ്ടമുള്ളവയുടെ പ്രിന്റ്‌ കോപ്പി വാങ്ങാനും സൗകര്യം ഒരുക്കിയിട്ടുണ്ട്‌. ഇതില്‍ നിന്നും ലഭിക്കുന്ന തുക മലയാളിക്കൂട്ടം നടത്തിവരുന്ന കാരുണ്യപ്രവര്‍ത്തനങ്ങള്‍ക്കായി വിനിയോഗിക്കും.

ഈ ചിത്രപ്രദര്‍ശനം സാക്ഷാത്കരിക്കാന്‍ അഹോരാത്രം പ്രയത്നിച്ച എല്ലാ മലയാളിക്കൂട്ടം അംഗങ്ങള്‍ക്കും, പ്രത്യേകിച്ചും കൊച്ചിയിലെ വളണ്ടിയര്‍മാര്‍ക്കും മലയാളിക്കൂട്ടത്തിനുവേണ്ടി സംഘാടകന്‍ നന്ദി അറിയിച്ചു. യാതൊരുവിധ സ്പോണ്‍സര്‍ഷിപ്പും ഇല്ലാതെ ഈ പ്രദര്‍ശനം വിജയം കൈവരിച്ചത്‌ മലയാളിക്കൂട്ടത്തിന്‌ ഒന്നുകൂടി ആത്മവിശ്വാസം പകര്‍ന്നുനല്‍കി. ഈ സംരംഭത്തിന്റെ വിജയം ഇനിയും ഇതുപോലുള്ള പ്രദര്‍ശനങ്ങളും മറ്റും സംഘടിപ്പിക്കാന്‍ പ്രോത്സാഹനവും കരുത്തും നല്‍കുമെന്നത്‌ ഉറപ്പാണ്‌.

മലയാളിക്കൂട്ടത്തിലെ ഒരു അംഗം പറഞ്ഞതുപോലെ “നമ്മുടെ ഈ സൌഹൃദവലയത്തിലെ ഒരു 10% പേരെങ്കിലും കൈകോര്‍ത്താല്‍ അസാധ്യമായത് എന്തും സാധ്യമാക്കം എന്നാണ് എന്റെ വിശ്വാസം“. അതെ, അതിന്റെ ഒരു തുടക്കമാണ് ഇവിടെ സാധ്യമായത്. ഇനിയും നമുക്ക് കൈകോര്‍ക്കാം, തുടര്‍ന്നുള്ള പ്രവര്‍ത്തനങ്ങള്‍ക്കായി.

*****

ഇനി കുറച്ച് ചിത്രങ്ങള്‍, ഓണക്കാഴ്ച പ്രദര്‍ശന ഉദ്ഘാടനവേളയില്‍ നിന്നും:

മുഖ്യാതിഥി റിട്ട:ജസ്റ്റീസ് വി.ആര്‍.കൃഷ്ണയ്യരെ സ്വീകരിച്ചാനയിക്കുന്നു.

റിട്ട:ജസ്റ്റീസ് വി.ആര്‍.കൃഷ്ണയ്യര്‍ ദീപം കൊളുത്തി ഓണക്കാഴ്ച പ്രദര്‍ശനം ഉദ്ഘാടനം ചെയ്യുന്നു

സാന്ത്വനം ചാരിറ്റബിള്‍ ട്രസ്റ്റിലെ അന്തേവാസി അമ്മു ദീപം തെളിയിക്കുന്നു

വേദിയില്‍ നിന്നും

റിട്ട:ജസ്റ്റീസ് വി.ആര്‍.കൃഷ്ണയ്യര്‍ സംസാരിക്കുന്നു.

സാന്ത്വനം ചാരിറ്റബിള്‍ ട്രസ്റ്റ് പ്രതിനിധി ജെസ്സി മലയാളിക്കൂട്ടത്തിനു നന്ദി പ്രകടിപ്പിച്ചുകൊണ്ട് സംസാരിക്കുന്നു.

എല്ലാവര്‍ക്കും നന്ദി, നമസ്കാരം.

ഇന്ത്യാവിഷന്‍ ചാനലുകാര്‍ക്ക് ഇന്റര്‍വ്യൂ നല്‍കുന്ന മലയാളിക്കൂട്ടം സംഘാടകന്‍

ഇതുപോലെ ഒരെണ്ണം എടുക്കാന്‍ എന്നെക്കൊണ്ടും പറ്റുമോന്ന് നോക്കട്ടെ. ഒരു കൊച്ചു പെണ്‍കുട്ടി പ്രദര്‍ശനചിത്രങ്ങള്‍ ക്യാമറയിലാക്കാന്‍ ശ്രമിക്കുന്നു.

***

എല്ലാവര്‍ക്കും നവവല്‍സരാശംസകള്‍, ഓണാശംസകള്‍!

ഓണക്കാഴ്ച - ഒരുക്കങ്ങള്‍ പൂര്‍ത്തിയായി.

2009-08-16T23:30:00.001+05:30

ഓണക്കാഴ്ച - ഒരുക്കങ്ങള്‍ പൂര്‍ത്തിയായി.

മലയാളിക്കൂട്ടം ഒരുക്കുന്ന ഓണക്കാഴ്ച ഫോട്ടോ പ്രദര്‍ശനത്തിനായുള്ള അവസാന ഒരുക്കങ്ങള്‍ പ്രദര്‍ശനത്തിന്റെ തലേദിവസം (ഇന്ന്) തകൃതിയായി നടക്കുന്നുവെന്നാണ് വിവരം ലഭിച്ചത്. മലയാളിക്കൂട്ടത്തിലെ കൊച്ചിയിലെ ഒരു കൂട്ടം ചെറുപ്പക്കാര്‍ ദര്‍ബാര്‍ ഹാളില്‍ ഒത്തുകൂടി ഫ്രേമിംഗ്/ലാമിനേഷന്‍ കഴിഞ്ഞ ഫോട്ടോകള്‍ നിലത്തിറക്കി നിരത്തിവെച്ച് പകച്ച് നില്‍ക്കുകയും പിന്നീട് ഇതെല്ലാം ഓരോയിടത്ത് തൂക്കിയിടണമല്ലോ എന്ന് ചിന്തിച്ചിരിക്കുമ്പോഴാണ് വിളി വന്നത്.

‍
ഹല്ലോ, എന്തൂട്ട്ണാ ഇത്രേം നേരായിട്ട് എവിട്യാ ഡാ ഗഡീ. എന്ത്, എത്ര വേണമെന്നോ?
ആങ്.. ഒരു ലോഡ് പോരട്ടേ. വിശന്നിട്ട് മനുഷ്യന് എണീറ്റ് നിക്കാന്‍ വയ്യാ. വേഗം കൊണ്ട്‌വാ.. വൈകിയാല്‍ ഈ മുന്നിലിരിക്കുന്നത് എടുത്ത്... ന്റെ കര്‍ത്താവേ!

അങ്ങനെ ഒരു ലോഡ് ‘സാധനം‘ ഡൌണ്‍‌ലോഡ് ചെയ്യുമ്പോഴേക്കും ഒരു അറ്റാക്കല്ലായിരുന്നോ അവിടെ നടന്നത്.

“എനിക്ക് വെറും രണ്ട് പൊതി ബിരിയാണിയെ ഒള്ളോ? അതോണ്ടൊന്നും പറ്റൂല്ലാ.“
“ചൂടാവാതെ, ഇന്നാ കുറച്ചുകൂടെ.”
“ഇതെന്താ പഴ്യേ ബിരിയാണ്യാ.. ഒരു തരം ‘മണം’ “
“നിനക്ക് വേണ്ടേല്‍ ഇങ്ങ്ട് താ”

അങ്ങനെ ഒരു ലോഡ് ബിരിയാണി അകത്താക്കിയപ്പോള്‍ ചിലര്‍ക്കൊക്കെ മയക്കം വന്നുതുടങ്ങി.
അവസാനം ഫോട്ടോകള്‍ കെട്ടിത്തൂക്കാനും മറ്റും മൂന്നാലുപേര്‍. പിന്നെ മറ്റുള്ളവരും കൂടി ഒത്തുചേര്‍ന്നപ്പോള്‍ സംഗതി ഉഷാറായി.

“ഈ പുലിയേയും പിടിച്ച് നില്‍ക്കാന്‍ തുടങ്ങിയിട്ട് നേരം കൊറെയായല്ലോ.. പുലിവാലാകുമോ”

അങ്ങനെ ചിത്രങ്ങള്‍ ഓരോന്നായി യഥാസ്ഥാനങ്ങളില്‍ ഫിറ്റ് ചെയ്തുതുടങ്ങി.

ചിത്രപ്രദര്‍ശനത്തിന്റെ ഉദ്ഘാടനം നാളെ (ആഗസ്റ്റ് 17-ന്‍്) നടക്കാന്‍ പോകുന്നതേയുള്ളൂ. അപ്പോഴേക്കും ചില സന്ദര്‍ശകര്‍ വന്നുതുടങ്ങി.

ഉദ്ഘാടനത്തിന്റെ തലേദിവസം തന്നെ കേട്ടറിഞ്ഞ് ചില സന്ദര്‍ശകര്‍ വന്നുതുടങ്ങിയത് മലയാളിക്കൂട്ടം സംഘാടകരെയും ഉഷാറാക്കി.

ഷോപ്പിംഗ് കഴിഞ്ഞു വരുന്ന വഴിക്കാണെന്നു തോന്നുന്നു, ചില സന്ദര്‍ശകര്‍ സാകൂതം ചിത്രങ്ങള്‍ വീക്ഷിക്കുന്നു.

***

ആഗസ്റ്റ് 17 മുതല്‍ 23 വരെ ( ചിങ്ങം ഒന്ന് മുതല്‍ അത്തം വരെ) നീണ്ടുനില്‍ക്കുന്ന, ഫോട്ടോഗ്രാഫര്‍മാരുടെ കൂട്ടായ്മയായ ഫ്ലിക്കര്‍ മലയാളിക്കൂട്ടം അണിയിച്ചൊരുക്കുന്ന ഓണക്കാഴ്ച ഫോട്ടോ പ്രദര്‍ശനത്തിന്റെ ഒരുക്കങ്ങളെല്ലാം പൂര്‍ത്തിയായി, നാളെ (17 ആഗസ്റ്റ്) ഉച്ചകഴിഞ്ഞ് 2.30 ന് ഉദ്ഘാടനത്തിന് കാത്തിരിക്കുകയാണ്. ബഹു.റിട്ട. ജസ്റ്റീസ് വി.ആര്‍.കൃഷ്ണയ്യര്‍ ഓണക്കാഴ്ച പ്രദര്‍ശനം ഉദ്ഘാടനം ചെയ്യുന്നതാണ്. ഈ അവസരത്തില്‍ വെച്ച് “സാന്ത്വനം” ചാരിറ്റബിള്‍ ട്രസ്റ്റിലെ കുട്ടികള്‍ക്കുള്ള ഓണപ്പുടവയുടെ വിതരണവും നിര്‍വ്വഹിക്കുന്നതാണ്.

***

നിങ്ങള്‍ ഏവരേയും ഈ പ്രദര്‍ശനത്തിലേക്ക് സഹൃദയം ക്ഷണിച്ചുകൊള്ളുന്നു.

ഓണക്കാഴ്ച്ച - ചിങ്ങം ഒന്ന് മുതല്‍ അത്തം വരെ.

2009-08-15T17:40:00.002+05:30

ഓണക്കാഴ്ച്ച - ചിങ്ങം ഒന്ന് മുതല്‍ അത്തം വരെ.

മലയാളിക്കൂട്ടത്തെ കുറിച്ച്‌ ഇവിടെ വായിക്കുക.

ലോകത്തിലെ വിവിധ ഭാഗങ്ങളില്‍ നിന്നുള്ള 1200-ഓളം അമേച്ചര്‍/പ്രൊഫഷണല്‍ ഫോട്ടോഗ്രാഫര്‍മാരുടെ കൂട്ടായ്മയായ ഫ്ലിക്കര്‍ മലയാളിക്കൂട്ടം കേരളത്തില്‍ വെച്ച്‌ നടത്തുന്ന ആദ്യത്തെ ഫോട്ടോ പ്രദര്‍ശനത്തിനുള്ള ഒരുക്കങ്ങളെല്ലാം പൂര്‍ത്തിയായി. കൊച്ചിയിലെ ദര്‍ബാര്‍ ഹാള്‍ ആര്‍ട്ട്‌ ഗാലറിയില്‍ ചിങ്ങം ഒന്ന്(ആഗസ്റ്റ്‌ 17) മുതല്‍ അത്തം (ആഗസ്റ്റ്‌ 23) വരെയാണ്‌ ഫോട്ടോ പ്രദര്‍ശനം ഒരുക്കിയിരിക്കുന്നത്‌. ലോകത്തിന്റെ വിവിധഭാഗങ്ങളിലുള്ള നൂറോളം മലയാളിക്കൂട്ടം അംഗങ്ങളുടെ, പ്രത്യേക ജൂറി തിരഞ്ഞെടുത്ത ഇരുന്നൂറോളം ചിത്രങ്ങളാണ്‌ കൊച്ചിയിലെ ദര്‍ബാര്‍ ഹാള്‍ ആര്‍ട്ട്‌ ഗാലറിയില്‍ പ്രദര്‍ശനത്തിനു ഒരുക്കുന്നത്‌.
ഓണക്കാഴ്ച പോസ്റ്റര്‍.

2009 ആഗസ്റ്റ്‌ 17-ന്‌ ഉച്ചതിരിഞ്ഞ്‌ 2.30-ന്‌ "ഓണക്കാഴ്ച" എന്ന പേരിട്ടിരിക്കുന്ന ചിത്രപ്രദര്‍ശനത്തിന്റെ ഉദ്ഘാടനം ബഹു: റിട്ട. ജസ്റ്റീസ്‌ വി.ആര്‍. കൃഷ്ണയ്യര്‍ നിര്‍വ്വഹിക്കുന്നതാണ്.

ഈ അവസരത്തില്‍ വെച്ച്‌ 'സാന്ത്വന'ത്തിലെ കുട്ടികള്‍ക്കുള്ള ഓണപ്പുടവ വിതരണോദ്‌ഘാടനം വിശിഷ്ട അതിഥികള്‍ നിര്‍വഹിക്കുന്നതാണ്‌.
ഓണക്കാഴ്ച ലഘുലേഖ-1.

ഓണക്കാഴ്ച ലഘുലേഖ-2

മലയാളിക്കൂട്ടം നടത്തിവരുന്ന കാരുണ്യപ്രവര്‍ത്തനങ്ങളുടെ ഭാഗമായി, ഒരു കൈ സഹായം എന്ന നിലയില്‍, ഈ പ്രദര്‍ശനത്തില്‍ നിന്നും കിട്ടുന്ന മുഴുവന്‍ തുകയും കൂട്ടം അംഗങ്ങള്‍ നല്‍കുന്ന വിഹിതവും ചാരിറ്റി പ്രവര്‍ത്തനങ്ങള്‍ക്ക്‌ വിനിയോഗിക്കാനാണ്‌ തീരുമാനിച്ചിരിക്കുന്നത്‌. ഇതിന്റെ ഭാഗമായി 'Help the Helpless' എന്ന തത്ത്വം കണക്കിലെടുത്ത്‌ 'സാന്ത്വനം' ചാരിറ്റബിള്‍ ട്രസ്റ്റിലെ 25 കുട്ടികള്‍ക്ക്‌ ഓണപ്പുടവ നല്‍കുവാനും തീരുമാനിച്ചിട്ടുണ്ട്‌. യാതൊരുവിധ സ്പോണ്‍സര്‍ഷിപ്പും ഇല്ലാതെ മുഴുവന്‍ ചിലവുകളും കൂട്ടം അംഗങ്ങള്‍ വഹിച്ചുകൊണ്ടാണ്‌ ചിങ്ങം ഒന്ന് മുതല്‍ അത്തം വരെ നീണ്ടുനില്‍ക്കുന്ന ഈ ഓണക്കാഴ്ച പ്രദര്‍ശനം മലയാളികള്‍ക്കായി ഒരുക്കിയിരിക്കുന്നത്‌.

മലയാളിക്കൂട്ടത്തിന്റെ "ഓണക്കാഴ്ച്ച" ചിത്രപ്രദര്‍ശനത്തിന്റെ മുന്നോടിയായി ആഗസ്റ്റ്‌ 14-ന്‌ കൊച്ചിയില്‍ വെച്ച്‌ ഒരു വാര്‍ത്താസമ്മേളനം നടത്തുകയുണ്ടായി.
മലയാളിക്കൂട്ടം പ്രതിനിധികള്‍ പ്രസ്സ് മീറ്റില്‍ പങ്കെടുത്ത് സംസാരിക്കുന്നു.

മലയാളമനോരമയിലെ വാര്‍ത്ത
മാതൃഭൂമിയിലെ പത്രവാര്‍ത്ത
ദേശാഭിമാനിയിലെ വാര്‍ത്ത
സൌദി അറേബ്യയില്‍ നിന്നുമുള്ള മലയാളം ന്യൂസിലെ വാര്‍ത്ത.

എറണാകുളത്തും സമീപപ്രദേശങ്ങളിലുള്ളവര്‍ തീര്‍ച്ചയായും ഈ ചിത്രപ്രദര്‍ശനത്തില്‍ പങ്കെടുത്ത്‌ വിജയിപ്പിക്കണമെന്നും, അതിനാല്‍ ഒരു ചെറിയ സഹായം ചെയ്യാന്‍ സഹകരിക്കണമെന്നും മലയാളിക്കൂട്ടത്തിനുവേണ്ടി അഭ്യര്‍ത്ഥിക്കുന്നു.

(പ്രദര്‍ശനത്തിനു വെച്ചിരിക്കുന്ന ചിത്രങ്ങളുടെ കോപ്പി ആവശ്യപ്പെട്ടാല്‍ സന്ദര്‍ശകര്‍ക്ക്‌ വിലയ്ക്ക്‌ വാങ്ങാനുള്ള സൗകര്യവും ഒരുക്കുന്നുണ്ട്‌.)

എല്ലാവര്‍ക്കും മുന്‍കൂറായി സ്നേഹവും ഐശ്വര്യവും നിറഞ്ഞ ഓണാശംസകള്‍!!

മലയാളിക്കൂട്ടം - ഒരു പരിചയം.

2009-08-14T17:40:00.003+05:30

മലയാളിക്കൂട്ടം - ഒരു പരിചയം.

ഫ്ലിക്കര്‍ എന്ന ഓണ്‍ലൈന്‍ ഫോട്ടോ ഷെയറിംഗ്‌ സൈറ്റില്‍ 'മലയാളിക്കൂട്ടം' എന്ന പേരിലുള്ള ഫോട്ടോഗ്രാഫര്‍മാരുടെ ഒരു കൂട്ടായ്മ 2007 ഫെബ്രുവരി മുതല്‍ സജ്ജീവമായി രംഗത്തുണ്ട്‌. ആദ്യകാലങ്ങളില്‍ കുറച്ചുപേര്‍ മാത്രമേ ഇതില്‍ അംഗങ്ങളായി ഉണ്ടായിരുന്നുവെങ്കില്‍ ഇപ്പോള്‍ അത്‌ 1200-നുമേല്‍ എത്തിനില്‍ക്കുന്നു. ലോകത്തിന്റെ വിവിധ ഭാഗങ്ങളില്‍ നിന്നുള്ള അമേച്ചര്‍ പടംപിടുത്തക്കാര്‍ തൊട്ട്‌ പ്രൊഫഷണല്‍ ഫോട്ടോഗ്രാഫര്‍മാര്‍ വരെ ഇതില്‍ അംഗങ്ങളാണ്‌.

വെറുതെ ഫോട്ടൊ ഷെയര്‍ ചെയ്യുകയോ, മല്‍സരങ്ങള്‍ സംഘടിപ്പിക്കുകയോ മാത്രമാകരുത്‌ മലയാളിക്കൂട്ടം കൂട്ടായ്മയുടെ ലക്ഷ്യം എന്ന് മനസ്സിലാക്കിക്കൊണ്ട്‌, ഓരോ പ്രദേശത്തുമുള്ള അംഗങ്ങള്‍ ഓഫ്‌ലൈനായി കൂടിച്ചേരല്‍ നടത്തുകയും അതിന്റെയൊക്കെ ഫലമായി പിന്നീട്‌ "കൂട്ടം" വക നിരവധി 'ഒത്തുചേരലും' ഫോട്ടോഗ്രാഫിയെ സംബന്ധിച്ച ചര്‍ച്ചകളും വര്‍ക്‌ക്‍ഷാപ്പുകളും സംഘടിപ്പിക്കുകയുണ്ടായി.

വിവിധ സ്ഥലങ്ങളില്‍ നിന്നുള്ള മുപ്പതോളം അംഗങ്ങള്‍ പങ്കെടുത്ത കൊച്ചി ബോള്‍ഗാട്ടി പാലസില്‍ 2007-ല്‍ നടത്തിയ ഒത്തുകൂടലായിരുന്നു ഇതില്‍ ആദ്യത്തെ വലിയ സംരംഭം.

തുടര്‍ന്ന്, ആതിരപ്പള്ളി, കൊച്ചി, ആലപ്പുഴ, കൊല്ലം, വാഗമണ്‍, വാള്‍പ്പാറ/ഷോളയാര്‍ ( വൈല്‍ഡ്‌ലൈഫ്‌ എക്സ്പെഡീഷന്‍), തൃശ്ശൂര്‍/ഗുരുവായൂര്‍, ബാംഗ്ലൂര്‍, ലണ്ടന്‍, ന്യൂയോര്‍ക്ക്‌,ദുബായ്‌, നെല്ലിയാമ്പതി എന്നിവിടങ്ങളിലും മലയാളിക്കൂട്ടം മീറ്റ്‌/വര്‍ക്‌ക്‍ഷാപ്പ്‌ സംഘടിപ്പിക്കുകയുണ്ടായി.

ബാംഗ്ലൂര്‍ കൂട്ടം മീറ്റ്

മലയാളിക്കൂട്ടം രണ്ടാം വാര്‍ഷിക മീറ്റ് - തൃശ്ശൂര്‍

വാഷിംഗ്ടണ്‍ കൂട്ടം മീറ്റ്

ലണ്ടന്‍ കൂട്ടം മീറ്റ്

കൊല്ലം കൂട്ടം മീറ്റ്.

മലയാളിക്കൂട്ടം നെല്ല്ലിയാമ്പതി മീറ്റ്/ഫോട്ടൊഗ്രാഫി വര്‍ക്ക്ഷാപ്പ്

ദുബായ് മീറ്റ്
മലയാളിക്കൂട്ടം അബുദാബി മീറ്റ്

മലയാളിക്കൂട്ടത്തിന്റെ ഭാഗമായ "ദോഹക്കൂട്ടം" എന്ന ഖത്തറിലെ ഫോട്ടോഗ്രാഫര്‍മാരും ദോഹയില്‍ ഒന്നിലധികം കൂട്ടുചേരലും വര്‍ക്‌ക്‍ഷാപ്പുകളും നടത്തിയിട്ടുണ്ട്‌.

ദോഹക്കൂട്ടം മീറ്റ്

ദോഹക്കൂട്ടം മീറ്റ്

ദോഹക്കൂട്ടം വാര്‍ഷികമീറ്റ്

ചാരിറ്റി പ്രവര്‍ത്തനങ്ങള്‍:

മലയാളിക്കൂട്ടം എന്ന കൂട്ടായ്മകൊണ്ട്‌ നമ്മുടെ സമൂഹത്തിന്‌ എന്തെങ്കിലും ചെറിയ സംഭാവന നല്‍കണമെന്ന് ഉദ്ദേശ്യത്തോടെ ചില കാരുണ്യപ്രവര്‍ത്തനങ്ങള്‍ക്കായി ചെറിയ തോതില്‍ ധനസഹായവും ഈ കൂട്ടായ്മ ചെയ്തുവരുന്നു.

* 2007-ല്‍ ഒരു സാധു പെണ്‍കുട്ടിക്ക്‌ പഠനത്തിനാവശ്യമായ തുക അംഗങ്ങള്‍ പിരിച്ചുനല്‍കി.
* മംഗലാപുരം സ്നേഹസദനിലെ കുട്ടികള്‍ക്കായി സംഭാവന നല്‍കി.
* ബാംഗ്ലൂര്‍ സ്നേഹദാനിലേക്ക്‌ സംഭാവന നല്‍കി.
* ചങ്ങനാശ്ശേരിയിലെ രക്ഷാഭവന്‌ ധനസഹായം നല്‍കി.
* കോഴിക്കോടിനടുത്തുള്ള പരിതസ്ഥിതിപ്രവര്‍ത്തകനും കൂലിപ്പണിക്കാരനുമായ പരേതനായ രാജന്റെ നിര്‍ദ്ധനരായ കുടുംബത്തിനുവേണ്ടി മലബാര്‍ നാച്ചുറല്‍ ഹിസ്റ്ററി സൊസൈറ്റി മുഖാന്തരം ഒരു വീട്‌ നിര്‍മ്മാണത്തിനു ദോഹക്കൂട്ടത്തിന്റെ വകയായി ധനസഹായം നല്‍കുന്നു.

ഫോട്ടോ പ്രദര്‍ശനങ്ങള്‍:

ലോകത്തിന്റെ വിവിധഭാഗങ്ങളിലുള്ള മലയാളിക്കൂട്ടം അംഗങ്ങള്‍ എടുത്ത മികവുറ്റ ചിത്രങ്ങളുടെ ഒരു പ്രദര്‍ശനം കേരളത്തില്‍ വെച്ച്‌ നടത്തണം എന്ന് കുറച്ച്‌ മാസങ്ങളായി പരിഗണനയിലുണ്ടെങ്കിലും പലകാരണങ്ങളാലും അത്‌ സാക്ഷാത്ക്കരിക്കാന്‍ കഴിഞ്ഞിരുന്നില്ല. ഇതിനിടെ മലയാളിക്കൂട്ടത്തിന്റെ ഭാഗമായ ഖത്തറിലെ "ദോഹക്കൂട്ടം" ദോഹയില്‍ വെച്ച്‌ രണ്ട്‌ ഫോട്ടോ പ്രദര്‍ശനങ്ങള്‍ വിജയകരമായി നടത്തി മാധ്യമശ്രദ്ധയും നേടി. Sight Insight എന്നതും കഴിഞ്ഞ ലോകപരിസ്ഥിതി ദിനത്തില്‍ enVision എന്ന പേരിലുള്ള ചിത്രപ്രദര്‍ശനവും അതിന്റെ വിഷയം കൊണ്ട്‌ വളരെ ശ്രദ്ധ നേടിയിരുന്നു. മലയാളിക്കൂട്ടത്തിന്റെ ഖത്തര്‍ഘടകമായ “ദോഹാക്കൂട്ടം” ഇന്നവിടത്തെ ഈ രംഗത്ത് അറിയപ്പെടുത്ത സംഘടനകളില്‍ ഒന്നാണ്. സംഘടന രൂപപ്പെട്ട് ഒരുവര്‍ഷത്തിനകം തന്നെ രണ്ട് വലിയ ചിത്രപ്രദര്‍ശനങ്ങളടം ഫോട്ടോഗ്രാഫിയുമായി ബന്ധപ്പെട്ട ഒരുപാട് സംരംഭങ്ങള്‍ സംഘടിപ്പിച്ച ദോഹാക്കൂട്ടം ഇതിനോടകം തന്നെ ഒട്ടനവധി പ്രശംസ പിടിച്ചു പറ്റിയിരിക്കുന്നു.

ദോഹക്കൂട്ടത്തിന്റെ എന്‍‌വിഷന്‍ ഫോട്ടോ പ്രദര്‍ശനവേളയില്‍ നിന്നും

ദോഹക്കൂട്ടത്തിന്റെ A Tribute to Qatar എന്ന ആദ്യ എക്സിബിഷനില്‍ നിന്നും

കൂട്ടം അംഗങ്ങളുടെ ഈ ആവേശം കെടാതെയാണ്‌ ഈ ഓണക്കാലത്ത്‌ കൊച്ചിയില്‍ വെച്ച്‌ "ഓണക്കാഴ്ച്ച" എന്ന പേരില്‍ ആഗസ്റ്റ് 17 മുതല്‍ 23 വരെ ചിത്രപ്രദര്‍ശനം ഒരുക്കുന്നത്‌.

ഇതിനെക്കുറിച്ച് അടുത്ത പോസ്റ്റില്‍.